எல்லோர் குறிப்புமறிய கற்பதுதான்
அம்மாவின் அரிச்சுவடி
குறிப்பாகக் கூட
அவள் குறிப்பு
அந்த பாடத்திட்டத்தில் கிடையாது
******************
தன் அம்மாவின் முகத்தையே
பொருத்திக் கொள்ளும் அம்மாவுக்கு
குறைந்தது இருபதாண்டை
விழுங்கிய
ஜீரணக்கோளாறு இருக்கலாம்
******************
மாதவிடாய்க்கறையை உறிஞ்சிவிடும்
நாப்கின்களில் இருந்து
அம்மாக்களுக்கு சக்தி உள்ளிறங்க
வழியுண்டா
தேவைப்படுகிறது
அம்மாவாய் இருக்க
****************
யார் அம்மாவுக்கு
உன்,என்,எல்லா அம்மாவுக்குந்தான்
****************
அம்மாவின் அன்பு
தூர இருக்கும்போதோ
தொலைந்து போகும்போதோ
மட்டும் மணக்கும்
***"*************
அம்மாவுக்கு வரும் ஆசைகள்
அபத்தமாகவும்
அம்மாவின் தேவைகள்
அற்பமாகவும் அமைவதுதான் எப்படி
***************"***
அம்மாவின் பிள்ளைகளாக
வளருமுன்
பிள்ளைகளின் அம்மாவாக
அவள் அடையாளம் மாறிவிடுகிறது
******************
நிரம்பி இருப்பதெல்லாம்
அம்மாக்கள் சிந்திய
அசட்டு சிரிப்பின் துண்டுகள்
மகள்களின் கைப்பைகளில்
அடிமூலையில்
நிச்சயம் அவ்வப்போது சிந்திய
சளித்துணுக்கு படிந்திருக்கும்
*******************************************************
வண்டி குலுங்கும்போது
நீங்கள் அதிர்வீர்கள்
முன்பின்னாக இடித்துக் கொள்வீர்கள்
நழுவி விழக்கூட நேரும்
அம்மாக்களுக்கு
அவை அனுமதிக்கப்படுவதில்லை
அவள் அப்போதும்
மகவை முந்தானையால் பொத்திக்
கரைசேர்த்துவிட வேண்டும்
உதிரிப்பூக்களோடு
உலகம் தயாராக இருக்கும்
கருத்துகள் இல்லை:
கருத்துரையிடுக