சொல்வதற்கென்று எதையும்
எடுத்து வைத்திராத பொழுதுகளில்
கை நீட்டாதே
நீர்வற்றிய நடுக்கம் வந்துவிடுகிறது
பொறுத்திரு
இருக்கட்டுமே
இப்படியும் ஓர் உலர்பொழுது
**********************************************
சிறு
கொப்புளத்தை நான் கட்டி
எழுப்பவில்லை
ஆனாலும்
முனை முகம் பார்க்கிறது
***************************************************
வைத்தவன் எவனோ
அவனே என் பூமியில்
சூரியனை ஏற்றியவனாவான்
ஆமென்
**************************************
கடித்தாவது
உன் துயரத்தைக் கொடு
துவர் கொய்யா போல
மென்று துப்புகிறேன்
சரி
அதற்குமுன்
அதைச் சீலைக்குள்
சுற்றிக்கொடு
***********************************
பகலில் இருள்போலவும்
இருளில் பகல்போலவும்
பிறழ்ந்து கிடக்கும்
வாழ்வின் காதைப்பிடித்து
திருகலாம் போலிருக்கிறது
ஆமாம்
காது எது
கருத்துகள் இல்லை:
கருத்துரையிடுக